"Bashkë solidarë": QSA ndihmon me 1.800, KBI me xhematin 1.000 euro (Foto)
Qendra Solidaritetit dhe Avancimit (QSA) u solidarizua me vëllezërit dhe motrat në zonat e përmbytura të Shqipërisë, duke iu përgjigjur ftesës për solidarizim dhe duke e mbështetur aksionin me moton “Bashkë solidarë”, të organizuar nga Zyrat për të rinj të komunave Preshevë dhe Bujanoc, Këshilli i të drejtave të njeriut në Preshevë, Forumet rinore të partive politike shqiptare, si dhe disa kompani lokale private nga Presheva e Bujanoci.
“Qëllimi i mbështetjes së këtij aksioni ishte solidarizimi me familjet e rrezikuara në zonat e përmbytura nga reshjet e mëdha të shiut, që shkaktuan dëme të konsiderueshme materiale në vendbanime të ndryshme të Shqipërisë, thuhet në njoftimin e QSA-së, transmeton Titulli.com.
Kjo organiat me seli në Preshevë mbështeti aksionin në fjalë, me qëllim të dërgimit të një mesazhi të përbashkët nga Lugina e Preshevës, me subjekte të ndryshme që veprojnë këtu, për të reflektuar në raste nevojash e fatkeqësish.
“Edhe pse popullata jonë ballafaqohet me një situatë të vështirë ekonomike e sociale, ajo e tregoi veten se di dhe mundet të ndajë edhe ato pak gjëra që i ka në dispozicion, vetëm e vetëm për t’u solidarizuar me njerëzit në nevojë”, thekson QSA, duke shpresuar që ky aksion, edhe pse jo aq i madh në përmasa në krahasim me nevojat ne terren, sado pak të ndikojë në zbutjen e gjendjes së vështirë të familjeve përfituese të ndihmave të grumbulluara në kuadër të aksionit.
“Ky aksion nga radhët e QSA-së u mbështet nga korpusi i gjerë i saj, gjegjësisht Qendrat tona në diasporë (QSA Zvicër, QSA Gjermani, QSA Belgjikë e QSA Austri), si dhe QSA në Preshevë. Shuma e mjeteve materiale të grumbulluara nga korpusi i QSA është 1,800 euro, shumë kjo e cila u shndërrua në artikuj ushqimorë e higjeniko-sanitarë” thuhet në njoftim.
Të gjithë artikujt me sasitë përkatëse, zyrtarisht iu dorëzuan përfaqësuesit të Zyrës për të rinj të komunës së Preshevës.
QSA në Preshevë falënderon qendrat e saj në diasporë për mobilizimin dhe mbështetjen e aksionit “Bashkë solidarë”, duke shpresuar që gjithmonë të jemi të bashkuar më afër nevojave të popullatës sonë.
KBI nga Bujanoci ndihmon me 1.000 euro
Kësaj iniciative sot i është bashkuar edhe Këshilli i Bashkësisë Islame në Bujanoc, me kryetar Sulejman Fejzullahun.
Imamët e xhamive të kësaj komune pas namazit të Xhumas, me autorizim të këtij institucioni, kërkuan nga xhemati të ndihmojnë familjet shqiptare të prekura nga kjo fatkeqësi.
Në këtë aksion të KBI-së në komunë të Bujanocit janë grumbulluar 121.000 dinarë, (1.000 euro) me të cilat u blen ndihmat ushqimore prej 121 pako.
Departamenti i të Rinjve pranë KBI-së tha se këto të dhëna po paraqiten për transparencë ndaj kontribuuesve dhe assesi për t’i bërë vetes marketing përmes këtij aktiviteti./Titulli.com/
